மும்பை
செப்டம்பர் எஃப்&ஓ தொடரில் நிஃப்டி 6.7% சரிந்த நிலையில், வெளிநாட்டு முதலீட்டாளர்களின் ‘ஷார்ட்’ நிலைப்பாடு 6 மாத உச்சத்தை தொட்டுள்ளது.
இந்திய பங்குச் சந்தைக்கு செப்டம்பர் மாதம் கடும் அழுத்தத்தை ஏற்படுத்தியது. செப்டம்பர் எஃப்&ஓ தொடரில் நிஃப்டி 1,400 புள்ளிகளுக்கும் அதிகமாக சரிந்து, 6.7 சதவீத இழப்பை பதிவு செய்தது. இது கடந்த 25 ஆண்டுகளில் செப்டம்பர் எஃப்&ஓ தொடரில் ஏற்பட்ட மிக மோசமான செயல்பாடாகும்.
வெளிநாட்டு நிறுவன முதலீட்டாளர்களின் (எஃப்ஐஐ) நிஃப்டி குறியீட்டு ‘ஷார்ட்’ ஒப்பந்தங்கள் ஆகஸ்ட் மாதத்தின் 2.08 லட்சத்தில் இருந்து 41.9 சதவீதம் அதிகரித்து 2.95 லட்சமாக உயர்ந்துள்ளன. இது 6 மாதங்களில் அதிகபட்சமாகும். அதேநேரம், ‘லாங்’ ஒப்பந்தங்கள் 27,879 ஆக மட்டுமே இருந்தன. இதனால் நிகர ஷார்ட் நிலை 2.67 லட்சம் ஒப்பந்தங்களாக உயர்ந்தது.
செப்டம்பர் தொடரில் எஃப்ஐஐ முதலீடுகளில் சுமார் 300 கோடி டாலர் வெளியேறியுள்ளது. கச்சா எண்ணெய் விலை உயர்வு, ரூபாய் மதிப்பு சரிவு, பத்திர வருவாய் உயர்வு ஆகியவை சந்தைக்கு அழுத்தம் கொடுத்தன. நிஃப்டிக்கு 22,600 புள்ளிகள் முக்கிய ஆதரவு நிலையாக பார்க்கப்படுகிறது. இந்த நிலைக்கு கீழ் சரிந்தால் மேலும் அழுத்தம் ஏற்படலாம் என சந்தை நிபுணர்கள் தெரிவித்துள்ளனர்.
